طار مشروعي السياحي

لطالما حلمت أن أشاهد في يوم من الأيام على قطعة الأرض المفضلة لدي فندقا سياحيا أو مدينة للالعاب المائية و لكن البارحة صدمت صدمت صدمت .
فباختصار المشروع السياحي طار لبعيد كتير (و يا سايح لوين رايح )
والله يا سادة يا كرام أنا عندي عادة حلوة مشان خلي حالي على طول متفائل حتى من اللاشيء فكل ما بشوف قطعة أرض مهجورة بقعد بيتخيلها شي مدينة ألعاب أو شي فندق سياحي أو شي ملعب غولف أو جامعة مثلا.
وهيك عايش فالحمد لله هيك كتير مبسوط من هالناحية وعندي إكتفاء ذاتي و حتى فائض بعدد المشاريع
بس اليوم وصلني خبر كسرلي ضهري وهو أن مديرية المياه ستقوم ببناء مقرها الجديد على أجمل إطلالة في مدينة حماه , فهذا المكان الذي يقع في أرقى حي ويطل على نهر العاصي و النواعير و القلعة و المدينة القديمة و و و ... سوف يصبح مقصدا لكل من يريد أن يدفع فاتورة المياه أو يسجل شكوى ,
عكل الأحوال ( الدريم لاند ) طارت و طلعت الشغلة من إيدي بس في عندي قطعة أرض تانية عم اتخيلها شي منتجع بس ما رح قول عليها مشان ما تاخدها شركة الكهربا , وبالمناسبة أنا عم حاول اقنع حالي بالسياحة الشعبية تبع أكل البزر بالحديقة بس ما عم تزبط معي